الحلقة الأخيرة

سابقا فى الريدل ونبوية

تركت حماتي ومضيت خارج البيت لأختلى بنفسي وما ان شعرت انني أصبحت بعيدا عن البيت حتي أمسكت الموبايل و.. ألو يا شفيق .. ها ايه اخبار نبوية؟ .. عايزك ترضعها كويس .. هتلاقى البزازة فى الشنطة جنبها .. وغمي عنيها كويس وانا جاي لك فى السكة

أعزائي القراء اعلم انكم تتسائلون من هو شفيق ؟ .. انا هقول لكم انه شفيق شيكا بوم الذى استأجرته ليخطف نبوية

الحلقة الأخيرة

ذهبت الى شفيق شيكا بوم وأنا كلي سورو خاطف مراتي ومحدش قدي .. فين نبوية يا شفيق؟ .. رد شفيق قائلا فى الأوضة اللى جوا يا بيه حسابي بقى يابيه .. أعطيت لشفيق باقى حسابه فأعطاني مفتاح الاوضة التي بها نبوية .. دخلت ووجدت نبوية فى شوال رز .. شوال رز يا شفيق؟! انا مش كنت جايب لك شيكارة اسمنت تعبي فيها نبوية معرفش الناس مالها اليومين دول الناس طماعه قوي .. فتحت شوال الرز ويالهول ما رأيت .. نبوية اتسخطت رز .. لأ يا غالية سخطوكي يا حبيبتي لأتنين كيلو رز .. مكنش يومك يا نبوية .. مكنش يومك يا مراتي .. أعمل ايه من بعدك يا لهوووووووي ... وأثناء ندابي وصراخي سمعت صوت همس صادر من الثلاجة يقول الحقوني .. نتبهت اذن دي اكيد نبوية .. وايه اللى خلاه يحطها فى التلاجة ؟ خايف عليها لتحمض ؟ ولا عشان النمل ؟ .. اسرعت وفتحت الثلاجة لأنقذ نبوية .. أخرجت نبوية وهي فى حالة اعياء شديد بسبب برودة الثلاجة أسرعت لأحضر لها حاجة دافية تشربها واقتربت منها وقولت لها عمل فيكي حاجة الحيوان اللى اسمه شفيق ؟! فقالت عمل كل اللى اتفقنا عليه سوا .. سألتها وباقى الخطة ايه ؟ فقالت هنروح نقضي اليوم سوا على لسان جمصة انا وانت عند الراية الحمراء .. قولت تمام .. يالا بينا .. ياللا

وفى الطريق .. انتى عارفة اني عايز اقعد معاكي انتى وبس ومفيش حد معانا من أهلك انتي بجد وحشاني وكان نفسي نقعد الاسبوع ده كله انا وانتي لكن انتى جبتي لى أهلك .. فردت نبوية قائلة مفيش أحسن من اللمة .. قولت لها حاجة زي دي مفيش فيها لمة اللمة دي تبقى فى اكلة .. فى عوزمة .. انما مش في الحالة دي عايز اقعد مع مراتي يا جدعاااان مش عايز حد من اهلها .. فقالت لى نبوية فعلا معاك حق .. المرة الجاية مش هجيب معايا اهلي فقولت لها ربنا يخليكي ليه يا نبوية احنا خلاص وصلنا الراية الحمراء هناك اهي شوفتي المنطقة ازاي هادية ورومانسية ده غير انها بتطل ع البحر وتقدري تشوفى الشروق والغروب .. والسمك بيطلع يمدد جنبك بالليل على ضوء القمر .. وابص فى عيونك واسهر ...... نظرت الى عيني وقالت بجد يا ريدل .. قولت لها والشوق مالى عيني بجد يا نبو .... هيييييييييييييييييييي فزعت على صوت الهيه ويالهول ما رأيت انهم العصابة عائلة نبوية قالوا فى نفس واحد انت اتخضيت قولت لهم لأ متخضتش قالوا لى علينا الطلاق بالتلاتة اتخضيت فقولت لهم أرحموني يا عم الكتكوت منك لها نظرت الى نبوية وقولت لها مين اللى قال لهم على المكان؟ فقالت انا .. فقولت لها وايه اللى جاب الغجر دول هنا قالت لى مش قولت لك مفيش احسن من اللمة ... وتركتني وذهبت لتحتضن عائلتها وفجأة سمعت صوت سارينة شرطة .. فقال لى والد نبوية انا كلمت الشرطة عشان يظبطوك متلبس بالخطف .. هنا لم استطع ان أتحمل وأخرجت مسدس من جيبي .. هقتلك يا نبوية ... طااااااااخ


أفق من شرودي على صوت نودج من نبوية اثناء حديثنا ع الماسنجر وهي تقول ايه يا استاذ اللى انت عامله فى المنتدي ده ؟

قولت لها عملت ايه يا نبوية بس؟
فقالت القصة اللى انت نزلتها دي بقى انا اسمي نبوية ؟
بقى انا بلبس على دماغي حلة ؟ وأهلى مش عارف ايه؟
ولما يغمي عليا بتفوقني بشربات ؟ وخاطفني يا ريدل؟
وبتقتلني كمان؟ بقى دي آخرتها تقتلني
قولت لها يا حبيبتي يا نبوية دي قصة تأليف كلها من دماغي انا كل اللى اخدته منك اجزاء من صفاتك بس وقولتها سواء كانت حلوة او وحشة زي مثلا طيبتك وحنيتك وطبيخك اللى فتحوا مركز اسعاف تحت شقتكم بسببه ورخامتك معايا ع الماسنجر وكلامك اللى كنتي بتطلعي بيه عيني رغم انك كنتي بتحبيني كل ده كنت بحاول احطه فى الشخصية اللى هي نبوية ومتنكريش ان الناس حبتك فى القصة وكانت متعاطفة معاكي

فقالت لى نبوية خلاص انا موافقة أصالحك بس بشروط
قولت لها عنية ليكي انتى تؤمرى سمو الاميرة
فقالت اممممم ... أولا مفيش كلام مع بنات على الماسنجر ولا على المنتدي لا تقولى بكلم مشرفات ولا بكلم عضوات
فقولت لها موافق
أكملت حديثها ثانيا مفيش مجاملات لعضوات ولا ياعسل ولا يا قمر ولا الكلام ده خالص .. مفهوم؟
فقولت لها مفهوم

وواصلت ثالثا ممنوع تقولى يا قمر ويا عسل والكلام ده الناس كلها بتقولي الكلام ده عايزة كلام رومانسي عن كده
قولت لها حاضر يا أميرة القمر
قالت نبوية رابعا بقى عايزة الناس كلها فى المنتدي يعرفوا مين هي نبوية اللى متعاطفة معاك ووقابلة انها تحبك
فقولت لها ازاي .. مينفعش .. أتوقف فيها .. ممنوع ..
فقالت ازاى وانا ملهمتك لولا تفنيني وفني العالى فى الرخامة عليك ولولا قدرتي الفذة وموهبتي فى الغتاتة مكنتش كتبت القصة بتاعتك دي يبقى حقى انك تعمل لى موضوع فى قسم افتح قلبك وتقول للناس انك بتحبني

فقولت لها صدقيني صعب .. من قوانين المنتدي انه ممنوع اني اكتب موضوع اقول فيه بحبك لبنت او العكس .. ده غير كمان اني اخاف من الناس انهم يحسدوني عليكي
فقالت نبوية بقى كده؟ .. طيب طلقني
فقولت لها اطلقك ازاى يا نبوية واحنا لسه متجوزناش ولسه مرتبطناش ببعض رسمي
فقالت مليش دعوة طلقني
قولت لها نبوية تقبلى تتجوزيني
فقالت انا قبلت زواجك
فقولت لها خلاص انتى طااااااااااااااااااالق

الحلقة التاسعه

سابقا فى الريدل ونبوية

الى أن سمعنا جميعا صراخ من الحجرة المجاورة ففزع الجميع يا ساتر يا رب .. اخذت اهدئ من روعهم ده صوت الموبايل يا جماعه رديت على الموبايل
فجاء صوت رجل يقول : اسمع احنا خطفنا نبوية مراتك
لو مجبتش ميت الف جنيه أول لو بلغت البوليس قول على نبوية يا رحمان يا رحيم
سمعت هذا الكلام وانا اكاد افقد الوعي من شده المفاجأة

*****************

الحلقة التاسعه

اسحلوني .. قطعوني .. خذوا قلبي .. خذوا عيني .. بس سيبوها .. سيبوها وخدوني .. ارحموها وعذبوني .. عيشوها واقتلوني .. أنا من غيرها مقدرش أعيش .. ليه عملتوا كده؟ انتوا مين؟ هي مش حمل بهدله .. دي رقيقة قوي .. دي حته مني ..عارفين يعني ايه حته مني؟ مقدرشي اعيش من غيرها..

هذا ما قاله حمايا اوعي رجلك وهو يرتجف من فرط انفعاله أخذت اهدي من روعه .. اهدأ .. لأ مش ههدأ .. يا عمي دانت اختارتني عشان بعرف اتعامل مع المواقف الصعبة بهدوء .. طيب اشرب كباية المية دي .. لأ مش هشرب .. طيب تعالى معايا .. لا مش جاي .. يا عمي تعالى بس

أخذته الي أقرب كافيتريا واتدبست في اتنين ليمون ( ياريتني ما قولت له تعالى )

دلوقتى نبوية اتخطفت واحنا قدام أمر واقع عايزين نفكر بهدوء هنعمل ايه فى المصيبة دي .. قال عمي وهو منهار يبقى نبلغ البوليس .. قولت له لو بلغنا البولبس مش بعيد ينفذوا تهديدهم ويقتلوا نبوية احنا نحضر لهم الميت ألف جنيه دي منين .. بصق عمي الليمون فى الارض وقال احنا هنجيب ليهم الميت جنيه دي منين

قولت لعمي أولا اسمها ميت الف جنيه .. ثانيا من الوديعه اللى انت مدكنها فى البنك

اقتنع اوعي رجلك ودفعت الحساب عشرة جنيه من لحم الحي ورجعنا الى المنزل فاستقبلتنا حماتي ظنانه هانم وعيالها بمجموعة من الشباشب والعصيان وكل ما طالته ايديهم من وسائل الحرب القديمة كأرجل الكنب و شوز المفعوص نبوي اللى لزق في دماغي .. فقال لها أوعي رجلك ..ايه اللي بتعمليه ده يا وليه؟ .. فقالت يقطعني يا خويا افتكرتكم العصابة اللى خطفت البت .. فقولت لها وانا أتحسس أثر الكلكيعه التي احدثها شوز نبوي .. ايه الحلل اللى على دماغكم دي ؟ وليه كل واحد فيكم شايل غطا حلة في ايده ؟

فقالت بنتدرب على اقتحام حصن العصابة .. فقولت لها بحلل وشباشب؟ فقالت ايوة ياخويا .. وامسكت الصافرة التى وضعتها على صدرها كأي حكم كورة وصفرت .. كتيبة صفا والعيال من وراها هوب .. كتيبة انتباه هوب .. ثم شربت كوب ماء وتساءلت ها عملتوا ايه ؟ فقولت لها هنعمل اللى هما عايزينه الميت ألف جنيه فبصقت الماء على الارض وقالت لى هنجيب ليهم الميت جنيه دي منين؟ فقولت لها أولا اسمها ميت الف جنيه .. ثانيا من الوديعه اللى جوزك مدكنها فى البنك فقالت ولا يغلوا على نبوية .. يارب نكسب الحرب ووضعت الصافرة فى فمها كتيبة للشمال دور .. هوب .. الى الامام مارش .. هوب .. هوب .. هوب

ذهبت لأخذ نفسي على الكنبة وانا اتساءل يا تري اكلتي كام واحد فيهم يا نبوية؟ يا تري فيه ضحايا ولا لأ؟ ياتري جعانة ولا عطشانة؟ وتخيلت نفسي وانا أواجه افراد العصابة التي تتكون من سبعه افراد وحمارين ومعزة وأنا أقف أمامهم كالذئب لأ كالأسد فأنا لا أحب المبالغه فى الحاجات دي فأضرب الاول كف اجيبه نصين وأضرب شقلباظ فى الهوا اقتل 23 وشلوت أموت فيه 14 واجيب 2 اسري معايا هديه لنبوية فى عيد ميلادها وأذهب لنبوية التي قيدت في الكرسي فأفك اسرها وينتهي هذا الفيلم السينمائي الرائع بقبلة سنيمائية ساخنه كأفلام اسماعيل ياسين .. ياااه قد ايه كنتي وحشاني يا نبوية .. تنظر لى ووجها احمر من كسوفها .. ايه يا نبوية موحشتكيش .. فترد فى كسوف وحنيه مانت عارف بتبقى واحشني بس انا تقيلة موت ومش بتكلم .. خلاص يا نبوية مش مهم أأخذها فى حضني .. تلكزني حماتي ظنانة هانم وهي تصرخ سيب رجلى يا زفت .. سورى يا حماتي اصلي سرحت فى نبوية
تركت حماتي ومضيت خارج البيت لأختلى بنفسي وما ان شعرت انني أصبحت بعيدا عن البيت حتي أمسكت الموبايل و.. ألو يا شفيق .. ها ايه اخبار نبوية؟ .. عايزك ترضعها كويس .. هتلاقى البزازة فى الشنطة جنبها .. وغمي عنيها كويس وانا جاي لك فى السكة
أعزائي الاعضاء اعلم انكم تتسائلون من هو شفيق ؟ .. انا هقول لكم انه شفيق شيكا بوم الذى استأجرته ليخطف نبوية
مالكم بتبصوا لى كده ليه؟ .. أيوة انا استأجرته ليخطف نبوية
بتقول ايه انت وهي؟ اللى حصل بعد كده؟؟
تابعونا الحلقة الجاية

الحلقة الثامنة

سابقا فى الريدل ونبوية

هنا بدأت نبوية فى البكاء

فلم ابالى وواصلت كلاميعايزاني اطلقك هطلقك .. انتى ميصحش تتجوزي واحد خاين انا هطلقك وهموت نفسي بعدها

انا خلاص بقيت خاين شرير العالم لازم يتخلص مني

فقالت نبوية :ريد...

لم تكمل كلمتها فقد فقدت نبوية الوعي

الحلقة الثامنة

أسرعت الى نبوية لأفيقها من حالة الاغماء .. متفرحوش كتير كده فنبوية ليست حامل .. فقد ظهرت عليها فى الفترة الأخيرة أعراض اغماء .. علماء الحفريات رشحوا ان سبب حالات الاغماء اللى عند نبوية بسبب مرض هبالوبيا وهو مرض منتشر بين القرود .. قرود يا نبوية ؟! .. أما اخوانهم من مدرسيين الرياضيات فقالوا ان الحالات دي بسبب الكبت النفسي اللى بتعاني منه نبوية لكن انا بخالف رأيهم بصفتي كنت عايز اطلع دكتور بس دخلت علمي رياضة في الثانوية العامة وبقول ان اللى عندها ده عشان مش بتسمع الكلام ودايما راكبة دماغها ومدلدلة رجليها .. لكن مش وقته عتاب لازم افوقها .. اجري ع المطبخ لأحضر شوية نشادر وشمت نبوية النشادر لكن مش عايزة تفوق .. ايه ده النشادر مش جايب نتيجة معاها .. طيب اجرب كده أأكلها نشادر يمكن يأثر فيها! .. اجري مرة اخرى على المطبخ لأحضر لها بصلة .. فين البصل ؟ .. فين البصل؟! .. عايز اعرف بتحطي البصل فين يا نبوية ؟! .. والحل ؟ مفيش غير حل واحد وسامحيني بقى يا نبوية هو اللى قدامي والقراء كلهم يشهدوا بكده حتي اسأليهم .. قربت منها وسديت مناخيري و .. جاى لكم فى الكلام اهو .. وسديت مناخيري و.. ومسكت الشوز بتاعها وشمي يا نبوية .. فاقت نبوية فنظرت الى عينها الله احلى عيون خلقها ربنا همست لها أوعي تعمليها تاني يا نبوية وابعدي عن الانفعالات .. فردت نبوية وعينها كلها رومانسية خايف عليا يا ريدل ؟ .. قولت متمسكا بهذه اللحظة الرومانسية لأ خايف على صدري اللى وجعني من ريحة شراباتك .. لم يعكر هذه اللحظة الرومانسية سوى بوكس من اديها الرقيقة اللى عاملة زي المرزبة في عيني الشمال ومفيش داعي احكي لكم على المكياج البنفسي الذى احاط بعيني حتي لا تفر الدمعة من اعينكم ..

بمناسبة الحر والصيف وبمناسبة انتهاء نبوية من امتحانات أولى ابتدائي قررت اننا نسافر نقضي يومين فى المصيف .. أخبرت نبوية فسعدت جدا بهذا الخبر وذهبت لأحد اصدقائي استلف منه قرشين لزوم المصيف .. فى المساء اخبرتني نبوية أن ظنانة هانم ( حماتي ) ستأتي المصيف معنا .. وماله يا حياتي تيجي .. قولت هذا وأملى أن يأتي قنديل يقضي عليها أو كابوريايا تقص لها لسانها وتخيلت الكابوريايا وهي ترى ظنانة هانم فتفقد الوعي من فزعها وتخيلت سمكة القرش وهي تستعطف ظنانة هانم للرفق بالحيوانات البحرية الصغيرة عملا بمبدأ العفو عند المقدرة .. أفق من شرودي على صرخة نبوية من الداخل التي افزعها صرصار فتجاهلت جميع صرخاتها واستغاثاتها وسبحت نفسي وع السرير ..

يأتي يوم السفر .. وعلى الفطار قالت نبوية ماما مش هتيجي معانا .. فقولت الحمد لله .. قالت بس نبوي هيجي .. قولت مش مشكلة نبوي .. واكملت حديثها وقالت وكمان اختي نسيكة وجوزها وعيالها وبابا وابن خالى مرعي العضاض .. خلاص يا نبوية كفاية .. واصلت حديثها وأخته وعيالها .. خلاص يا نبوية .. قالت كده خلاص ماما بقى هتحصلنا كمان يومين .. قولت لها ايه بس اللى هيجيبها .. قالت وبعدين ؟؟ يالا عشان اتصلوا بينا واقفين لينا فى الشارع

ذهبنا الى جمصة وبمجرد ما ان وضعنا الحقائب فى الشقة المفروشة اتجهنا برابطة المعلم الى البحر هنا لم تجد نبوية وقت للطبخ فى الشقة فقررت ان تقوم بتلك المهمة ع البلاج .. اشتركنا جميعا فى حمل الخضار والارز والحلل اما انا كان معايا وابور الجاز .. وع البلاج قابلت دكتورى السابق عتريس بايخ (80سنة ) الذي كان يقف مع زوجته مدام عتريس بايخ عجوز فى السبعين

فى انتظار ان يخف المرور قليلا حتي يتمكنا من عبور الكورنيش . حاولت اني اساعدهم لكن فشلت بسبب خوفهم الشديد ما علينا عبرت الشارع مع باقى القطيع وفرشنا القعده ودقينا الشماسي وبدأت نبوية فى الطهي وما ان فرغت حتي قالت لى سي ريدل .. عاوزة انزل البحر .. قولت لها البحر ذنبه ايه ؟

فقالت لى يووه من نفسي قولت لها يا ولية اعقلى .. هتلبسي مايوه؟!

شهقت لأ طبعا حنزل كده حشمة ونزلت بالفسان زي الباقى فطفي الفستان على البحر وانكشف اللى كان مخفي وانا قاعد اجز على سناني من المنظر اطلعي يا نبوية اطلعي يا ختي

وفى آخر النهار مشينا وسبنا ذكرياتنا العطرة من بقايا المحشي اللى وربنا ما ذوقته وقشر البطيخ واثناء عبور الكورنيش اتفاجئت بعتريس بايخ ومراته لسه واقفين ع الرصيف متحركوش فى انتظار ان المرور يخف ليعبروا الى البلاج .. واخيرا جت الفرصة وعبروا الطريق اثناء عبورنا بالعكس ويكتشف عتريس وزوجته ان ميعاد البلاج انتهي والناس راجعه على بيوتها فيقرران العودة هما كمان ويقفوا فى انتظار فرصة تانية للعبور فى الاتجاه المضاد وتوالت ايام المصيف واحنا بنقضيها بحر بالنهار وبالليل ذرة مشوي وايس كريم وغزل البنات وسينما ولب وسوداني وفى مرة اتهورت واخذت العيلة بعد الحاح شديد الي مطعم على الكورنيش جات لى فاتورة الحساب بصيت عليها 250 جنيه سندوتشات فول وطعميه مدرتش بنفسي واغمي عليا ع طول جالى صاحب المطعم وفوقني وجابت عصير ليمون ليصبح الحساب 255 جنيه فيغمي عليا مرة تانية

أما عتريس فكان بيقضي ايام المصيف مع مراته فى عبور الكورنيش ولما سألته قالى من الصبح لحد الظهر بنفضل واقفين لحاد ما الشارع يروق نقوم نعدي عشان نروح البلاج .. قولت له وبغد اما تعدوا ؟ .. قال اول ما نوصل الرصيف التاني نستعد للعوده بقى فنقف من الظهر لغاية بالليل لحاد ما نعدي ونروح بيتنا .. قولت له بانهداش والغذاء؟ .. قالى بناخد معانا سندوتشات ناكلها ع الرصيف .. قولت له على كده بقى مانزلتوش البلاج أبدا

قالى نهائي .. أمال جايين جمصة تعملوا ايه ؟ .. فقال لى بكل ثقة نعدي الكورنيش

بصراحة كانت ايام المصيف ايام رائعه لكن كان ينقصها شئ ما ايه هو الله اعلم .. سألت حماتي : ايه اللى ناقصنا يا ظنانة هانم فردت وقالت ناقصنا انك تغور من هنا

فقولت بيني وبين نفسي اعوذ بالله من دي وليه وسألت نبوي ايه اللى ناقصنا يانبوي فقال لى ناقصنا نأجر عجل

الى أن سمعنا جميعا صراخ من الحجرة المجاورة ففزع الجميع يا ساتر يا رب .. اخذت اهدئ من روعهم ده صوت الموبايل يا جماعه رديت على الموبايل

فجاء صوت رجل يقول : اسمع احنا خطفنا نبوية مراتك

لو مجبتش ميت الف جنيه قول على نبوية يا رحمان يا رحيم

سمعت هذا الكلام وانا اكاد افقد الوعي من شده المفاجأة

ياتري ايه اللى حصل

هنعرف المرة الجاية

الحلقة السابعة

الحلقة السابعة

ان التظاهر بشئ من الهيستيريا بين حين و آخر له فعل السحر .. فقد علمتنى التجارب مع نبوية انها تكره حقا ان ترانى محتفظ بهدوئي ان ذلك يثير اعصابها ليه لأنها بتقول على نفسها تقيلة وعشان هي تقيلة فلازم اكون خفيف عليها فقد حدث ذات مرة ان انسكب كوب الشاي الساخن بجوار رجلها فقلت لها بهدوء ان كباية الشاي وقعت .. فنظرت لى باستغراب وحملقت فى وجهي وهي مغتاظة وقالت ايه كل البرود ده .. انت معندكش ذرة من الانفعال
ومن الوقت ده وانا عندي انفعال هيستيري لأقل سبب .. فأصرخ حاسبي فيه سلمة مكسورة .. على مهلك .. وأصرخ فيها وهي بتعبر الطريق على مهلك فيه عجلة جاية من بعيد .. وفيه مرة حصل انها اهدتني نظارة شمسية ونسيتها فى احدى الاماكن العامة ثم قولت .. ياه نسيت النظارة .. فاجابت وهي تكتم غيظها .. هو ده كل اللى فى بالك .. انت عارف نظارة زي دي تمنها كام؟ تنساها ببساطة كده؟
ولما الكرافته اللى جابتهالى اتقطعت بعد كده .. ضربت ايدي على صدرى وولولت منتحبا .. معددا فى بكاء رهيب .. قائلا .. الا دي .. ياخدوا عنية .. ياخدوا روحي .. لكن دي؟ الحاجة اللى من ريحتك اللى لا يمكن تتعوض .. ولطمت على وجهي .. فأخذت هي تهدي من روعي وهي تقول .. خلاص محصلش حاجة .. متضايقش كده بكرة يكون عندك الاحسن منها وانا اهز راسي نافيا .. لأ ابدا أبدا وبدأت فى الانسحاب التدريجي من التمثيلية ببطئ طبقا للخطة الموضوعه وطبعا منستش ان عنية تدمع بين كل وقت والتاني فتسألني مالك؟ فيه ايه ؟ فأقول لها بلجهة حزينه مفيش .. بس أصلى افتكرت الكرافته
حتي فى اى حاجة تانية بدأت استخدم الطريقة دي .. فمثلا كسرت كوباية المية فقولت .. يا ساتر ياساتريارب هما الناس مش عايزين يرحموكي .. هي العين مش عايزة تسيبك بقى مصايب ورا بعض كده .. الكوباية مدشدشة .. ياريتها كانت كوبايتي انا .. هنا ستجدها هي التى ستقول .. معلش مفيش حاجة هي جت على قد كده
نبوية بتحب تحس باهتمامي ناحيتها وده وقعني فى مشاكل كتير بقيت خلاص بعرف اتفاداها دلوقتى .. فى مرة ارتطم صباعها برجل الترابيزة فأخذت تصرخ صرخة مدوية وتمسك بصباعها
آي .. أه .. ياني .. ثلج .. بن .. ميكروكروم .. شاش .. ثم قصيدة من اللوم والعتاب توجه لى .. انت واقف كده ولا كأن حاجة حصلت .. الا ما اتحركت .. ولا عملت حاجة
وفى مرة تانية فتحت الحنفية تغسل ايدها وكانت الحنفية ع الساخن فالتهبت صوابعها .. ورقعت بالصوت الحياني .. صراخ رهيب فى الحمام كأنها اخذت طعنة بالسكينه .. وجريت عليها وانا مش عارف ايه اللى حصل .. ولما لقيت المسألة بسيطة مقدرتش اتحكم فى نفسى .. وضحكت وكان يوم اسود فى حياتي
بتضحك وانا ايدي محروقة .. بتضحك وانا بعيط؟! وانا بتألم
وكان لازم اصالحها بالتأكيد وشعرت بالم ايدها المحروقة وانا بدفع لها دم قلبي ثمن هدية الصلح
وده اللى عملته فعلا عشان اطلع من الموقف لما اكتشفت اني أقدر اخونها
صرخت .. ازاى؟ تشكي فيه ازاى؟
وليه؟ وعشان ايه وانا اللى كنت بايد لك صوابع ايدي شمع ينور حياتك دانتى كنتي امي واختي وحبيبتي دانتى كنتي اللى ليه فى الدنيا ديه انا مقدرش اعيش بعد كده لحظة انا لازم اموت نفسي.. ايوة انا هنتحر
لعلمك قبل ما انتحر .. انا كنت عارف انها نمرة مرفس صحبتك
وعشان كده اتصلت عشان اعرفك اني لو حبيت اخونك هخونك
هنا بدأت نبوية فى البكاء
فلم ابالى وواصلت كلامي عايزاني اطلقك هطلقك .. انتى ميصحش تتجوزي واحد خاين انا هطلقك وهموت نفسي بعدها
انا خلاص بقيت خاين شرير العالم لازم يتخلص مني
فقالت نبوية : ريد...
لم تكمل كلمتها فقد فقدت نبوية الوعي
ونشوف ايه اللى حصل الحلقة الجاية

الحلقة السادسة

الحلقة السادسة

من الصعب دلوقتى وصف الغيرة والشك اللى فى نبوية بسبب امها مدام ظنانة
لكن قدام الغيره والشك ده انا بتعامل معاها ببرود أعصاب ولا مبالاه لأن شايف اللى نبوية بتعمله حاجة عادية لأن من غباوة الرجل انه بيعتبر ان فيه فرق بين الزواج والحادثة
بسبب غيره نبوية وشكها خسرت كل صحباتها في وقت واحد ماعادا صحبتها مرفت .. ومرفت دي بنت فاتها قطار الزواج .. بيني وبينكوا مطلع على مرفت اسم مرفس لشده الشبه بينها وبين الحيوانات اللى بترفس .. حتي كمان ساعات بيتهيألى انها هربانه من حديقة الحيوانات
وفى مرة كلمتها شوفى يا نبوية يا حبيبتي الشك اللى فى دماغك ده وهم يا حبيبتي انا مليش فى الدنيا غيرك ولا هبص لبنت غيرك ولا بصيت لبنت غيرك يا نبوية تعرفى انا ليه مستحمل مامتك؟
عشان اثبت لك اني شجاع فى المواقف الصعبة وعشان اثبت لك انى بتحمل الكوارث بنفس راضية وبهدوء وعشان يكون فى حياتنا تحديات بحيث نقدر اننا نواجه ال ... خخخخخخخخ
الظاهر ان نبوية نامت وانا بكلمها .. صحيتها من النوم قولت لها فوقى معايا يا نبوية انا مش حاسس منك بحب
قالت لى انت شاكك فى حبي؟
قولت لها لأ مش شاكك بس مش شايف منك حب ده الكلب لما بيحب بيهز ديله وهو فرحان والحمار لما بيحب بيرفس رفسة فى الهوا حتي العصافير لما بتحب بتزقزق
قالت لى وهي مقتنعه بكلامي فعلا معاك حق يا ريدل بلا نكد بلا هم وانا فعلا غلطانة اني مش بحسسك بحبي و .... آه يا عيني رفستني حته رفسه فى عيني كانت هتطيرها .. دي بقت حياتي مع نبوية
أصبت بصداع عابر فقالت نبوية لازم تبطل تاكل شيكولاته
وشافتني بتألم من ضيق الشوز الجديد فقالت لى لازم تبطل تاكل شيكولاته .. وقعت مني كباية الشاى فقالت امتي هتبطل تاكل شيكولاته بقى واتزحلقت فى قشرة موزة وانا ماشى فى الشقة فقالت نبوية كلمتها المأثورة انى لازم ابطل آكل شيكولاته
حتي ان أكل الشيكولاته بقى بيتسبب فى مشاكل تانية فمثلا مرة النور اتقطع فقالت لى فى عصبية امتي هتبطل تاكل شيكولاته؟
ومن الطبيعي ألا اتناقش مع نبوية أبدا بعد ان اثبتت لى انها كالزبون دايما على حق
الشيكولاته ضارة فعلا عشان سناني ليه متكونش هي السبب فى ان الشوز الجديد ضيق وليه متكونش فعلا بتسبب فى ان النور ينقطع
فكرت كتير اني ابطل آكل الشيكولاته وخصوصا بعد اما زادت حالات انقطاع النور لكن مقدرتش امسك نفسى ولما مقدرتش وقفت لى نبوية بكل قوة وأصرت اني ابطل أكل شيكولاته استسلمت وبقيت باكل شيكولاته فى السر .. ولأنها عارفة كل ماليم فى جيبي منعت ميزانية الشيكولاته اللى بتمثل كل ثروتي
للاسف كنت مضطر اني اسرق منها الشيكولاته بتاعتها فهي بتاكل علبتين شيكولاته فى اليوم
وفى يوم قالت لى نبوية على ميزة جديدة من مزايا عدم اكل الشيكولاته وهي الاقتصاد فى الفلوس
فهي وفرت كل الفلوس اللى باكل بيها شيكولاته واشترت لى هدية بمناسبة عيد ميلادي
قالت لى نبوية غمض عينك عشان المفجأة , فتحت عيني لقيت ايدها قربت مني وبتقولى ايه رأيك فى الخاتم ده .. شكله حلو فى ايدي؟
قولت لها مبروك يا نبوية
وخلعت نبوية الخاتم اللى فى صباعها اللى اشترته لنفسها فى عيد ميلادي عشان تعرفني ان اسمي مكتوب على الخاتم وقالت لى شوفت ازاى انا بحب اسمك يا ريدل
قولت لها ميرسي يا نبوية هديتك حلوة فعلا
لكن الشك والغيره لسه فى قلبها اتهمتني ظلم اني بكلم على الماسنجر زبيده وست ابوها وحلاوتهم
لكن بيني وبينكوا مقدرتش لحد دلوقتى تكتشف البنات اللى كنت بصيع معاهم ع الماسنجر زي نفيسة و بخاطرها وفتكات مقدرش انام
وفى يوم اتهمتني بتهمة جديدة قالت ايه هي علاقتك دلوقتى بنجفة؟
قولت لها نجفة مين ؟
قالت لى نجفة اللى كنت بتصيع معاها على المنتدي
قولت لها ببرود انا مش فاكر اني اتعرفت على بنت اسمها نجفة فى المنتدي
قالت متستهبلش انت ليه مش شجاع عشان تعترف
قولت لها ساعات بيكون الانسان خايف قدام الكوارث
فقالت يعني انا كارثة؟
قولت لها مانتى طلعتي ذكية أهو
فأخذت تبكي لاعنة اليوم اللى بعت لها فيه رسالة خاصة
وقالت بقى انت مش عارف نجفة .. نجفة اللى كانت شبه مي عز الدين
قولت لها مي عرف الديك مين؟
قالت عشان كده طول عمرك كنت معجب بالممثلة دي
قولت لها لو هي فعلا شبه نجفة عز الدين ابقى اهبل لو كنت سبتها
فقالت مي عز الدين وأخذت تبكي
وتركتها ونمت
بعدها بيومين قالت لى انا مسافرة البلد لماما هقعد هناك اسبوع
قولت لها الباب يفوت معزة وشعرت وكأنني رجعت لمرحلة الشباب أخيرا هصيع فى البيت أسبوع
دخلت الى المطبخ وجدت ورقة على الثلاجة كاتبه فيها
انا عملت لك عصير المانجة اللى بتحبه ومليت لك بيه التلاجة ابقى اشربه كله
قولت لنفسي قد ايه نبوية طيبه وحنينة لكن برضه ميمنعش اني أصيع لمدة اسبوع وهي مش موجوده اخذت زجاجة مانجة
ذهبت الى غرفة النوم فوجدت ورقة على الارض
الظاهر انها واقعه من نبوية قبل ما تمشي
فتحت الورقة ونظرت الى داخلها
فوجدت صورة نجفة وعلى ظهرها رقم تليفونها
فنظرت الى الصورة وابتسمت واخيرا هصيع
اتصلت بالنمرة فردت امرأة صوتها كروان
قولت لها منزل نجفة؟
قالت انا نجفة
عرفت نفسي عليها وقولت لها انا الريدل وقولت لها وانا بضحك تعرفى انك سببتي لى مشكلة عائلية مراتي فاكرة اننا نعرف بعض فقالت لى فعلا انا كنت اعرف واحد اسمه الريدل
قولت لها انا؟
فقالت انت بصراحة وسيم عنه
قولت لها انتي شوفتيني؟
قالت ايوة فى الصورة اللى بتشرب فيها السيجارة
كان الكلام الحلو ده كفيل انه يسعدني واستأذنتها اني اتصل بيها تاني يوم ولقيتها موافقة
قفلت السماعه وحسيت بعدها بخدر لذيذ بيجرى فى جسمي
ونمت
تاني يوم حضرت ازازة المانجة واتصلت بيها
سألتني اذا كنت بشرب سجاير
فقلت لها انا ولا شربت ولا بشرب ولا هشرب
فقالت احسن حاجة عملتها وبتعملها وهتعملها وشكلنا هنبقى اصحاب قوي
أصحاب؟ دي بشرى جامدة
قفلت السماعة وذهبت الى السرير افكر فيها ونمت
كل يوم على الحال ده
فى الليلة الخامسة اعترفت لها بحبي وبدأت اغازلها
وكنت كل مرة بكلمها بحس ان كلمات وغزل نجفة كان بمثابة مخدر بيجرى فى كياني وبيسلمني لنوم جميل عميق وأحلام وردية سعيدة
ولما رجعت نبوية من السفر قالت لها مرفت ( مرفس ) انها قامت بدور نجفة على أجمل وجه, وقالت لها ان الريدل كان بينام كل يوم بفضل المخدر اللى كان فى عصير المانجة
ايه اللى حصل بعد كده
هنعرف الحلقة الجاية